Ains 98

GINO ELIA

nassut a Glemone ai 27 di dicembar dal 1912

muart a Glemone ai 7 di jugn dal 2011

       nô nevos 'o volin ricuardâti cun dôs peraulis parceche tu nus as compagnats te nestre cressite, diventant par nô un grant pont di rifirement.

Ducj ti cognossin soredut in vie Dante, la vie che tu fasevis a pît ogni dì par lâ a cjase tô a curâ la to vere passion: la piture di cuadris e di iconis religjosis.

Nus plâs ricuardâti cun ce tant inpegn che tu as dediât la to vite al côr e di fâ su il presep di San'Antoni e cun tante contentece e ligrie che tu tornavis a cjase po dopo la Messe de domenie.

Nûs plâs ricuardâti come une persone energjiche e plene di vite, cul to biel caratar, a voltis ancje ruspiôs, di chest o vin ancje profitât ogni tant par fâti inrabiâ, no lu vin fat cun tristerie ma par tigniti su cun la vite e chest, forsit, a ti à judât a rivâ fin a cuasit 100 ains cun-t-une salût di fiêr e une energje che ben pôs, a tô etât, a dimostrin di vei.

Nono nestri, o volin saludâti cun-t-un grazie par veinus judât a cressi, par veinus tignut manfuarte cuant che i nestris gjenitôrs nus vosavin e o sperin che di lassù tu continuis a veglâ su di nô, fasint cidinâ chê mancjance che soredut in taule a si sint digià.

                                MANDI

(in furlan di Glemone scrit di Elena Contessi - gnece)

(in furlan di Paulâr  scrit di bande di Alessandro Elia - nevôt)

                    nô nevôz volin ricuardâti cun dôs peraules parceche tu nus as compagnâz ta neste crescite, deventant par nô un grant pont di riferiment.

Duçj ti cognosevin, soredt in via dante la vie che tu fasevis a pît ogni dì par lâ a cjase tô a coltivâ la tô vere passion: la piture di cuadris e ancones religjôses. Nus pâs ricuardâ l'impegn che tu as dât a la tô vite, al côr, a la preparzion dal presep di Sant'Antoni, la contentece e la ligrie che vevis cuant che tu tornavis a cjase dopo la Messe da domenie.

Ti ricuardin come une persone plene di energje e di vite, cul to biel carater, a voltes encje ruspiôs, di chest ultin ogni tant i vin profitât par fati inrabiâ, ma no par tristerie, ma par tigniti su la vite e forsit encje chest al à giovât par fâti rivâ cuasit a 100 agns cun-t-une salût di fiêr e une grinte che ben pôs, a la tô etât a dimostrin di vê.

Non netri, vulin saludâti cun-t-un Grazie par venus judât a cressi, par venus tignût manfuarte cuant che i nestis gjenitôrs a nus vosavin e sperin che di lassù, ti continuis a veglâ su di nô, fasint emplâ chel vuet che sorudut in taule digià si sint.

                                MANDI